Завгүй Цагийн Хуваарьтаа Яаж Дасгал Хөдөлгөөн Хийх Цаг Гаргах Вэ
Бид бүгд завгүй байгаа. Завтай байсан бол бүгдийг л хиймээр байгаа, тийм үү. Заримдаа би өөртөө хэлдэг завтай байсан бол хүүхэддээ илүү ном уншиж өгч, хамтдаа тоглох юмсан, завтай байсан бол бүжиг сурах юмсан, олон ном унших юмсан, янз бүрийн хоол хийж сурах юмсан гээд л… хийх сонирхолтой зүйлүүд зөндөө байгаа. Гэхдээ зарим тохиолдолд зайлшгүй хийх ёстой зүйлээ ч хийх завгүй байх үе их гардаг. Тийм болохоор би энэ бичлэг дээр хэрхэн яаж дасгал хөдөлгөөн хийх цагийг завгүй цагийн хуваарьтаа гаргах тухай маш энгийн зөвлөмжийг оруулж байна.
Эхний арга бол дасгал хөдөлгөөн яагаад таны амьдралын чухал нэг хэсэг вэ гэдгээ өөртөө сануулна. Бид зөвхөн чухал гэж бодсон зүйлээ цагийн хуваарьтаа оруулж хийдэг. Дасгал хийх нь бидний эрүүл мэнд, бие махбодь, оюун ухаанд зайлшгүй хэрэгтэй гэдгийг өөртөө сануулснаар бид цагийн хуваарьтаа оруулах болно. Цагийн хуваарьтаа оруулснаар дасгалаа хийхээ өөртөө сануулж чадна.
Дараагийн арга бол дасгалуудаа хэдэн жижиг хэсэг болгох. Жишээлбэл, өглөө хэдхэн минут кардиогоо хийгээд, үдээс хойш хүчний дасгалуудаа хийгээд, орой хэвлийн дасгалаа хийх жишээтэй. Ингэснээр хичнээн завгүй ч гэсэн жижиг жижгээр хийх ёстой дасгалуудаа хийж дуусгана.
Дасгалаа тууштай хийхэд өнөөдрийн зөвлөмж жаахан ч гэсэн тус болох байх гэж бодож байна. Тийм бол доор тийм гэж комментоо үлдээгээрэй.
ХҮС. ХИЙ. ХҮР.
Ука Төмөрийн Хамт